ЕПАРХИЈА

Австралиско-новозеландската епархија е една од 12-те епархии на Македонска Православна Црква – Охридска Архиепископија, и една од четирите епархии надвор од Македонија.

Јурисдикцијата на Австралиско-новозеландската епархија ги опфаќа териториите на Австралија и Нов Зеланд.

Надлежен Архиереј, со титула Администратор Австралиски и Новозеландски, е митрополитот Преспанско-пелагониски г. Петар.

Седиштето на Епархијата се наоѓа во Мелбурн каде што постои Соборна црква, зграда на Митрополијата и Митрополитска резиденција.

Епархијата е организирана во две архиерејски намесништва:

  1. Архиерејско Намесништво за Викторија, Јужна и Западна Австралија и Нов Зеланд;
  2. Архиерејско Намесништво за Нов Јужен Велс и Квинзланд.

Во составот на Епархијата, денес, активни се: 3 манастири, 14 Црковни општини – парохии, 12 цркви и 7 епархиски духовни центри.

Свештенослужителската и пастирската мисија ја извршуват: 14 свештеници, еден игумен, една игуманија и тројца пензионирани свештеници.

Епархијата од 2000 г. редовно го печати Епархиското списание Осми ден.

Духовниот живот напредува и се развива во сите црковни општини во Епархијата. Верниците активно учествуваат во богослужбите и Литургиите, редовно се исповедуваат и причестуваат и живееат со Светите Тајни на Црквата.

Заедничко дело на Австралиско-новозеландската епархија, Преспанско – Пелагониската епархија, на црквата Света Петка од Мил Парк и останатите цркви е капиталното издание: Преводот и препевот на 16 тома богослужбени книги на современ Македонски јазик.