Македонската православна црква – Епархија за Австралија и Нов Зеланд, од неодамна стана одобрен провајдер за православна веронаука на Министерството за образование на Нов Јужен Велс, Австралија.
Специјалното верско образование (СРЕ) е доброволна (факултативна) програма во државните училишта во Нов Јужен Велс. Учеството е бесплатно, на доброволна основа и по избор на родителите или старателите.
Програмата за православна веронаука на МПЦЕАНЗ во Државните училишта ќе го надополнува општото образование на македонските православни деца.
Со благослов на Неговото Високо-преосвештенство митрополит г. Петар, програма е шестгодишна и претставува студирање за источното православно христијанство и настојува да ги покрие клучните аспекти на православната вера.
Прегледот на овластената наставна програма од Епархискиот просветен совет на МПЦЕАНЗ е достапен на родителите, старателите и студентите, според барањата на Одделот за образование во Нов Јужен Велс. Списокот на теми заедно со општите цели и резултатите од учењето се објавени и достапни на веб-страницата: https://www.mocdanz.org.au/en_AU/oce/sre/authorised-curriculum/
Родителите и старателите се добредојдени да ги разгледаат лекциите и темите што ќе им се предаваат на нивните деца, и да ги видат деталите на веб страната.
Начинот на предавање и учење ќе се одвива со посебна чувствителност и соодветно на возраста.
Учителите – предавачи на часовите по православно вероучение се волонтери кои се одобрени, овластени и обучени од локалната парохија и Австралиско-новозеландската епархија.
За овластените наставниците, МПЦЕАНЗ ќе обезбедува постојана обука за имплементација на наставната програма. Епархијата и Советодавната комисија до наставниците, редовно ќе доставуваат препораки за потребните ресурси и основна литература за предавањата.
Со благослов на Неговото Високо-преосвештенство митрополит г. Петар е предвидена подготовка, издавање и печатење на учебници за учениците, и наставни помагала за наставниците.
Целта на програмата е кај студентите да се развие свеста, разбирање и ценење на Православието како сведок на Светото Писмо и чувар на учењето на Црквата, но и да ги потикне да учествуваат во Светите тајни на Црквата.
За да добиете дополнителни информации, посетете ја страницата на SRE на МПЦЕАНЗ на следниот линк: https://www.mocdanz.org.au/en_AU/oce/sre/