На пет дена пред Пасха, Исус ги испрати Своите ученици да приведат ослица со мало осле. И Оној што за престол го има небото, седнат на осле влегува во Ерусалим. Децата пред Него ги постилаа своите облеки и палмови гранчиња, а некои носеа во рацете маслинови гранчиња и го поздравуваа: Осана на Синот Давидов, благословен е Оној кој доаѓа во името Господово, Царот Израилев! Децата научени од Светиот Дух, тоа го правеа во слава и чест на Христа и на тој начин ја најавуваа Христовата победа над смртта.